माण्डवी गाउँपालिका जस्पुर प्यूठानको गाउँसभाको १५ औं  अधिवेशनको दोश्रो बैठक आज गाउँपालिकाको सभाहल जस्पुर प्यूठानमा सम्पन्न भएको छ । सभामा गाउँपालिकाको शिक्षा नीतिको संशोधन प्रस्ताव, स्वास्थ्य नीति र विद्यालयमा कक्षा थप सम्बन्धि प्रस्तावहरु माथी छलफल भई पारित भएको छ । सभामा शिक्षा नीति र कक्षा थप सम्बन्धि प्रस्ताव सामाजिक विकास समिति संयोजक प्रकाश वली र स्वास्थ्य नीति सम्बन्धि प्रस्ताव प्रमुख प्रशासकीय अधिकृत प्रकाश पाण्डेले सभामा प्रस्तुत गर्नु भएको थियो । गाउँसभाको १५ औं अधिवेशनको तेस्रो बैठक फागुन १५ गते वस्नेछ ।

माण्डवी गाउँपालिकाले आ.व. २०८०/०८१ को प्रथम चौमासिक सार्वजनिक सुनुवाई कार्यक्रम सम्पन्न गरेको छ । गाउँपालिकाले आर्थिक वर्ष २०८०/०८१ को प्रथम चौमासिकमा सम्पादन गरेका कामको प्रभावकारिता तथा नागरिक सन्तुष्टि तथा गुनासो सुनुवाई गर्ने उदेश्यका साथ सार्वजनिक सुनुवाई कार्यक्रम आयोजना गरिएको हो । माण्डवी गाउँपालिकाको आयोजना तथा रेडियो माण्डवीको सहजीकरणमा गाउँपालिका सभाहल देवीस्थानमा सोमबार सार्वजनिक सुनुवाई कार्यक्रम संचालन गरिएको हो ।

"सुरक्षित मातृत्व हामी सबैको दायित्व, स्वास्थ्य संस्थामा हुने सुत्केरी दिगो बनाऊ सधैं भरी" भन्ने मूल नाराका साथ  माण्डवी गाउँपालिका वडा नं.-१ तिरामलाई एक कार्यक्रम विच आज मिति २०८०/९/२७ गते  पुर्ण सुरक्षित मातृत्व सेवायुक्त वडा घोषणा गरिएको  छ । यस सँगै माण्डवी गाउँपालिकाका संपूर्ण वडाहरू पूर्ण सुरक्षित मातृत्व सेवायुक्त वडा घोषणा गर्ने कार्यक्रम सम्पन्न भएको छ ।

माण्डवी गाउँपालिकाको आयोजनामा मार्सिबाङ खेलकुद मैदानमा संचालित दोश्रो राष्ट्रपति रनिङशिल्ड खेलकुद प्रतियोगिता २०८० सम्पन्न भएको  छ ।   यही पुस २४ गते बाट शुरु भएको उक्त प्रतियोगिताको आज २६ गते समापन गरिएको हो । माण्डवी गाउँपालिका अध्यक्ष नमराज अधिकारी ज्यूको अध्यक्षतामा संचालन भएको कार्यक्रमको प्रमुख अतिथि संविधान सभा सदस्य नारायण प्रसाद अधिकारी रहनु भएको थियो ।